健康達人--健康DotCom

節錄自澳門日報，2013-10-12

潮流興跑步，已成為新興文化，衍生不一樣的生活態度。不過，不論日跑或夜跑，都需要一套“軍裝”。近年跑步裝備相當受歡迎，越出越靚，越賣越貴，越賣越專業。

現今的都市人，講求健康，單車風、跑步風一吹就起，身邊好多老友都如沐春風，日日在面書曬命，今天去咗邊，跑了幾多K，正式參賽也非少數。作為零運動的過氣運動員，好慚愧。

以前講過，單車裝好誇張，雖然靚又專業，但業餘人哪用得著？扮嘢兼滿足車手慾望高於一切。跑步又如何？慶幸跑步裝比較簡單，一條短褲、一件背心，加一對跑鞋就得，價錢也平幾條街，不過也應有所講究。

據敎練話，跑步最好著透氣背心，有利皮膚呼吸及排汗。標準的跑步褲“要短到冇人有”，不鬆不緊。有人喜歡穿類似單車褲的機能褲，據說可減少肌肉晃動，提高下半身爆發力。對此要揷一句，業餘啫，邊使咁認眞，只要入運動服裝店，一講跑步背心、褲就選擇多多，幾浮誇都有，冇啱式樣，求其一套都無問題，反正不是參加奧運會。

反而，一對跑鞋才是跑者最重要的配備，也是最應講究及最應用錢的部分。市面上好的跑鞋很多，質量重要過外形，唔好刻薄對腳及膝頭，否則一定後悔。